院舍活動
獅鼓迎耆樂．關懷暖人心｜香港關懷力量 × 香港創峰龍獅體育會探訪活動
舞獅獻瑞賀長者
義工探訪暖院舍
廣福護老院（葵興）｜2026年10月25日
⏰時間：下午2:30 – 4:30
📍地點：廣福護老院（葵興）
10月25日（星期日）下午，廣福護老院（葵興）迎嚟一班特別嘅客人——香港關懷力量嘅義工朋友，同埋香港創峰龍獅體育會嘅大小朋友，一行11人專誠到訪，同院友一齊度過咗一個又熱鬧又窩心嘅下午。
活動兩點左右，創峰體育會嘅朋友仔率先到場，個個著住好有辨識度嘅橙色創峰隊服，當中有四、五個小朋友，精靈又可愛，仲帶埋成套傳統又靚嘅舞獅道具嚟！一開場，獅子喺鑼鼓聲中舞得起勁，為院友帶嚟一場震撼嘅舞獅表演，全場睇到拍爛手掌，氣氛即刻熱鬧晒。
舞獅表演過後，關懷力量嘅義工朋友陪住院友一齊玩「估水果」遊戲——義工畀提示，院友估係邊種生果，個個爭住舉手搶答，答中嘅開心到見牙唔見眼。創峰會嘅小朋友仲好主動咁逐個送上小禮物，收到禮物嘅院友笑得更開懷，成個大堂都係歡笑聲。
另一邊廂，關懷力量嘅呂先生牽頭，同院友一齊點歌、唱歌同樂，大家唱住熟悉嘅金曲，歌聲繞住成個院舍，暖意十足。同一時間，創峰會嘅舞獅隊亦冇停過，走入房間逐個探望行動唔方便、冇得出嚟睇表演嘅院友，將祝福直接送到床邊。
活動尾聲，有興趣嘅院友仲可以親手摸吓獅子頭，寓意「摸過獅子頭，好運自然嚟」，個個摸完都笑住話要博個好兆頭。愉快嘅時間特別快過，今日有咁多小朋友陪住，院友個個都話玩得好開心，成個下午都浸喺幸福嘅氣氛入面。
今次探訪活動，唔單止為院友帶嚟一個充滿歡笑嘅下午，更加係一次跨代共融、社區關懷嘅溫暖體現——小朋友同長者打成一片，傳統舞獅文化得以傳承，令老友記深深感受到來自社會各界嘅關懷同重視。
本院衷心感謝香港關懷力量同香港創峰龍獅體育會嘅悉心安排同無私付出，你哋嘅愛心同活力，為院友帶嚟滿滿嘅溫暖同祝福。期待日後再有機會相聚，繼續將呢份愛心傳落去！
廣福護老院（葵興）
光愛中心義工探訪同樂活動
⏰ 時間：下午2:00 – 4:30
📍 地點：廣福護老院（葵興）
當日下午，光愛中心一共11位義工朋友蒞臨本院，與院友們開展溫馨的互動同樂活動，院友們積極投入，場面充滿歡笑。
活動一開始，先進行「看圖猜內容」遊戲，院友們踴躍舉手答題，答對即可獲得笑臉貼紙作獎勵，當中有幾位院友一共儲到15個笑臉，表現非常出色。接下來是「找出不一樣圖案」遊戲，大家同樣投入參與，認真觀察、踴躍回應。
遊戲過後，義工與院友一同齊唱經典金曲，包括《獅子山下》、《漫漫人生路》、《朋友》等。不少院友對歌曲十分熟悉，毋須歌詞都能唱得很好，歌聲溫暖動人。
其後，義工老師分享個人故事，和院友們一同分享「耶穌愛我們」的訊息，彼此靜心傾聽。活動尾聲，義工朋友送上精心準備的禮物，當中累積最多笑臉貼紙的院友，更獲得雙份禮物。大家其後閒談交心，在輕鬆愉快的氣氛下，結束是次相聚時光。
是次活動，目的為院友帶來歡樂，透過遊戲、歌唱、分享與禮物派送，送上社區的關懷與問候，讓院友感受被愛、被重視。
本院在此衷心感謝光愛中心一眾義工朋友的用心策劃、無私付出，為院友帶來一個難忘、溫暖的下午，期待日後再有機會相聚。
廣福護老院（葵興）
【活動回顧】愛德循環運動 × 中華傳道會李賢堯紀念中學 學生義工探訪長者康樂活動
廣福護老院(葵興)活動報導
藝人 A Team 蒞院探訪 提早共賀中秋 滿院溫馨歡笑
2026-09-21
臨近中秋佳節，本院有幸邀得中國香港藝人網球聯盟（A Team）會長郭晉安、副會長黃子恆、創會成員李思雅，聯同一眾藝人好友、「極地同行」慈善團體及義工團隊到訪我們廣福護老院(葵興)，與院內超過一百位院友提早慶賀中秋，場面熱鬧又溫暖。
活動一開始，本院同事率先為一眾院友及嘉賓送上精彩表演，打開歡樂氣氛。現場氣氛迅速升溫，不少院友興致勃勃，拿起麥克風一同高歌，臉上滿是燦爛笑容，盡情享受歡樂時光。
一眾藝人朋友親切走入長者之間，逐一同院友傾談、互動，細心聆聽院友分享，不少院友都興奮不已，歡笑聲不絕於耳。郭晉安、黃德斌等藝人更成為現場人氣王，沿路跟院友揮手打招呼，不少院友見到他們都十分雀躍，熱情回應。
藝人們輪流送上歌曲表演，台下院友專心欣賞，有人隨住節奏揮手、點頭和唱，投入於表演之中。團隊亦向院友派發小禮物、閃燈手燈，不少院友開心伸手接過禮品，歡喜之情溢於言表。
一眾嘉賓、院舍職員同院友齊齊互動、拍手合唱，全院瀰漫住濃厚的節日氣氛，暖意滿溢。
廣福護老院一直致力為院友打造豐富、充滿歡樂的院舍生活！活動尾聲，A Team 全體藝人與本院職員一同合照留念，為是次充滿愛心的探訪活動畫上圓滿句號。
土瓜灣院舍活動
葵興院舍活動
荃灣院舍活動
屯門院舍活動
大埔院舍活動
